Hoxe imos presentarvos o programa Agroecoloxía na Escola e como foi xestándose ao longo do tempo.
No ano 2019 iniciamos a construción da horta na EEI As Dunas de Panxón en mans de Diana Muñoz Somoza (actual socia de SomosTerra) e colaboradores externos para que os máis pequenos da parroquia nigranesa de Panxón puideran aprender a plantar e cultivar os seus propios alimentos. Para conseguilo, comezamos facendo obradoiros presenciais trimestrais durante o curso 19/20. Nestes obradoiros a cativada aprendeu sobre plantación, pero, tamén, sobre xestión de residuos, plantas aromáticas e mediciñais, biodiversidade… e moitos aspectos máis relacionados coa sostibilidade e a Axenda 2030.
Para acompañar estas actividades presenciais e coa axuda do profesorado do centro, enviamos todos os meses un caderno de campo con actividades sinxelas para que o alumnado poida levar a cabo sen a nosa supervisión. Así pasaron os meses, e, mentres o alumnado plantaba e colleitaba, Diana supervisaba e coidaba a horta durante todos os meses do ano, para que nas vacacións non quedara a nosa leiriña abandonada.
Horta na Escola de Educación Infantil As Dunas
Co inicio do novo curso 2020/21, continuamos co Programa na EEI As Dunas e o alumnado do CEIP Mallón de Nigrán uníuse ao Programa. En decembro do 2020 fixemos o primer obradoiro presencial con eles para que a cativada entendera a importancia de ter unha horta no cole. Durante as vacacións de nadal, SomosTerra estivo construíndo a horta das Rás (nome escollido por votación do alumnado). Durante os seguintes meses comezamos a plantar e coidar da horta mediante 7 obradoiros presenciais máis (un ao mes). Para que a nosa hortiña non quedase abandonada durante os meses sen cole, estivemos plantando durante o campamento de verán que coordinamos no mesmo centro.
Coa fin do verán e o inicio do curso escolar 21/22 continuamos co programa Agroecoloxía na Escola na EEI As Dunas e no CEIP de Mallón, no que en novembro rematamos a renovación e reconstrución da horta das Rás, agora con novos bancais de madeira reciclada.
Horta no CEIP Mallón
Traballando nas melloras dos bancais de cultivo.
Ademais, co inicio do curso uniuse outro dos centros educativos de Nigrán, o CEIP Humberto Juanes, onde iniciamos a remodelación e restauración dos bancais do invernadoiro e construimos unha pequena horta exterior e un xardín vertical en setembro deste mesmo ano. Durante este curso escolar estaremos realizando obradoiros presenciais mensuais con todos os cursos do centro educativo e enviándolles o caderno de campo para que continúen co coidado na horta co noso apoio durante todo o ano.
Horta no CEIP Humberto Juanes
