Hoxe queremos explicarvos en que consiste a Educación para a Sostibilidade porque consideramos que define a nosa forma de traballar. Como sabedes, no último ano levamos a cabo diferentes iniciativas que nos teñen moi emocionadas. Por unha parte, coordinamos o programa educativo “Agroecoloxía na Escola” nos colexios públicos de Nigrán. Tamén puxemos en marcha a primeira Horta Urbana de Nigrán, da man do concello e das máis de 60 persoas inscritas. Fixemos charlas e diferentes obradoiros para todas as idades, tanto na horta urbana, coma en distintos puntos da xeografía galega. En todos eles, o obxectivo principal é a transmisión de coñecemento sobre sostibilidade. Durante o verán coidamos das hortas escolares e fixemos o campamento en Panxón, en colaboración con Teatro do Ar. Neste campamento continuamos traballando da forma que máis desfrutamos: a través da educación para a sostibilidade. Pero entón, en que consiste este tipo de educación?
A Educación para a Sostibilidade diríxese a todas as persoas, independentemente da súa idade. Desenvólvese desde a perspectiva da aprendizaxe ao longo de toda a vida, e utiliza todas as modalidades de aprendizaxe: formal, non formal e informal. A educación para a sostibilidade reflicte a preocupación por unha educación de elevada calidade que axude ás persoas para entender o que pasa (saber), a sentirse parte da sociedade na que viven (saber ser) e a coñecer como poden participar nos procesos de desenvolvemento (saber facer). Pero, ademais, desenvolve a capacidade de aprender a aprender.
• Está baseada en valores totalmente alineados coa sostibilidade.
• Desenvolve o pensamento crítico, afronta dilemas e capacita para buscar solucións aos problemas.
• Está orientada á acción. A soa conciencia non produce cambios. Máis aló de sensibilizar, a educación para a sostibilidade promove o compromiso.
• Asume a participación na toma de decisións, incluíndo as relativas á contorna e á forma de aprendizaxe.
• Adopta un enfoque interdisciplinar e holístico.
• Utiliza múltiples leitos e recursos didácticos (a palabra, as artes plásticas, a dramatización, os debates, as experiencias, etc.) para construír de forma conxunta o coñecemento, superando a simple transmisión de coñecementos.
• É significativa para quen aprende e tamén para a comunidade, integrando as experiencias didácticas na vida persoal e profesional.
• Considera tanto a escala local como a global cando enfoca os problemas do desenvolvemento.
Ademais da definición máis oficial, extraída da publicación Educación para la sostenibilidad. Joseba Martínez Huerta. Ingurugela – Centro de Educación e Investigación Didáctico Ambiental, queremos deixarvos este video pois consideramos que pon imaxe e cor ao que entendemos por Educación para a sostibilidade. É unha recompilación dalgúns dos momentazos vividos no campamento de verán 2022.