Categoría: Iniciativa CooperAcción 2021!

Este inverno 2022/23 está a ser especialmente duro para as nosas hortiñas, ente treboadas, fortes ventos, abundantísimas chuvias… levamos uns meses facendo malabares coas datas para non deixar de acompañar a cativada nas súas labores labregas… E sorprendentemente non foi nada mal!

O inverno na horta ten as súas actividades propias:

Como todo o prantado tarda moito en medrar por por do frío e os días cortos… facemos outras cousiñas importantísimas, como voltear ben o compost, plantar flores para ir atraendo ós polinizadores… imos a caza de caracois e babosas… Desfrutamos das tarefas propias do inverno.

Pero tamén temos dous grandes cultivos estrela, que só podemos plantar neste tempo. E os dous teñen súperpoderes!!!

Cultivos estrela no inverno

As fabas: plántanse entre Decembro e Xaneiro,  directamente no chan, de semente. Teñen a virtude de nutrir o solo, xa que son leguminosas, e fixan o nitróxeno ao chan. En Galicia é moi tradicional preparar as Leiras plantando fabas no inverno, para segalas en Marzo e asegurar unha boa produción primaveral. Nutricionalmente son tamén moi completas e con gran cantidade de proteínas.

Os Allos:  Xa o di o refrán…

“Todos os días que pasan de xaneiro son allos que perde de dar o alleiro”

Así que en decembro estamos a tempo de plantalos, normalmente plantamos o dente de allo, para recoller como allete tenro en marzo. Poñémolos por todos os rincóns da hortas menos xunto ás fabas, xa que non asocian ben. Entre as súas virtudes como cultivo, vai moi rápido e axuda a loitar contra os caracois e babosas co seu forte cheiro. Nutricionalmente en allete fresco ten moitas propiedades antibióticas, cousa boa neste tempos que corren : )

Así pasamos o inverno marabillosamente, preparándonos ben, e tendo todo controlado,  para unha fermosa primavera na horta.

Como sabedes, a sede principal da cooperativa está en Nigrán, onde levamos a cabo a maior parte das nosas actividades. Este último ano, o programa educativo Agroecoloxía na Escola está sendo o noso programa estrela. A raíz do interés por parte das familias, colaboramos co concello de Nigrán para facer realidade un soño compartido: a primeira horta urbana de Nigrán.

Esta horta está ubicada no teito verde do aparcamento da Ramallosa. Comezaremos coas actividades o vindeiro sábado 23 de abril onde xa están dispostos 13 bancais inspirados na xeometría das colmeas de abeellas. Todas as persoas interesadas en participar deben inscribirse previamente a través do formulario online ou presencialmente no aparcamento municipal da Ramallosa. O prazo para participar estará sempre aberto e o único requirimento é estar empadroado en Nigrán e cumprir as pautas de funcionamento.

A principal característica desta horta é que será un espazo adicado á formación e a colaboración entre as persoas usuarias, é dicir, as persoas participantes realizaremos os traballos polo ben común e non en parcelas de uso individual, distribuíndose a posteriori a colleita de maneira equitativa entre os participantes. Para iso, Diana, Eva e Raquel, técnicas de SomosTerra, estableceremos un calendario de tarefas que todas as persoas deberán seguir e, en caso de acudir a facelo, deberán sinalalo nun taboleiro situado no propia horto co fin de estar todos coordinados. Cada mes estableceremos uns criterios de plantacións idóneas á estación e asociacións e intolerancias entre plantas, faremos tamén un diario de campo e estaremos abertas a recibir propostas alternativas por parte das persoas inscritas.

De feito, todos os sábados de 12:00 a 13:30 horas impartiremos obradoiros gratuítos, comezando o día 23 de abril cunha sesión dedicada ás plantas aromáticas e continuando nas posteriores con asuntos como compostaxe e vermicompostaxe, hortos verticais, plantas medicinais, control biolóxico de pragas, recollida de auga… A maiores, os mércores (de 17:00 a 18:30 horas) estarán as técnicas presentes na horta para resolver presencialmente dúbidas, asesorar e colaborar.

Queremos que este sexa un espazo de convivencia e de encontro entre a veciñanza, por iso promoveremos tamén o intercambio de sementes e a creación dun banco que recompile as variedades locais”. Deste xeito, esta zona verde da Praza Carlos Casares, que non se empregaba para nada e pasaba totalmente desapercibida, transfórmase nun punto de encontro no que aprender, compartir, cultivar e desfrutar.